Tifozja u vetëdogj pasi shkoi në stadium, FIFA reagon për ligjin që ndalon femrat

Pak ditë më parë, një lajm i trishtë erdhi nga Irani, aty ku një tifoze futbolli kishte vendosur të shkonte në stadium për të ndjekur ndeshjen mes Esteghalit dhe Persepolisit. Pak ditë më vonë, kjo tifoze u vetëdogj duke u bërë shembull dhe zëri i shumë femrave të tjera që duan të shkojnë por që nuk i lejon ligji.

Kjo ka bërë që në Iran të shpërthejnë reagimet e shumta dhe jo vetëm, duke qenë se edhe institucioni më i lartë i futbollit në botë, ka reaguar. Xhani Infantino, presidenti i FIFA-s u shpreh se ligji që ndalon femrat është një ligj i papranueshëm dhe që ka nevojë urgjente për t’u rishikuar.

“Shpresoj që Federata dhe autoritetet iraniane të dëgjojnë kërkesën tonë të përsëritur në mënyrë të vazhdueshme dhe t’i japë fund kësaj situate të papranueshme. I kam kontaktuar disa herë dhe kemi një delegacion anëtarësh të FIFA-s në Iran dhe mezi po pres që të marrim ndonjë lajm të mirë nga Irani. Qëndrimi ynë është i qartë dhe femrat duhet që të pranohen në stadium. E dimë se këto hapa duhet të merren që gjërat të shkojnë në mënyrë të sigurt, por shpresojmë të bëhet mirë”, u shpreh Infantino. /Erjon Allaraj-VipSport.al/