Te Malaga fillojnë të shqetësohen, do të humbin Baren prej Shqipërisë

Situata e klubit të Malagas në këtë sezon nuk është ndër më të mirat. Me vetëm 5 pikë pas 5 ndeshjeve të para, skuadra e sheh veten në vendin e 16 në kategorinë e dytë spanjolle, shumë larg objektivave që kishet para se të konfirmoheshin problemet financiare që e detyruan të largonte shumë titullarë.

Në një situatë kaosi, ajo që bezdis tashmë më shumë klubin duket se është prania e Keidi Bares me përfaqësuesen e Shqipërisë. Kur ka grumbullime kombëtaresh, Bare do të mungojë në ndeshjet e kampionatit të La Liga 2 i cili vazhdon edhe në datat e FIFA-s. Mediat spanjolle insistojnë se te Malaga kanë filluar të llogarisin ditët kur Bare do të jetë larg tyre, pasi në ekip nuk kanë askënd tjetër që luan në rolin e tij, duke komanduar mesfushën nga thellësia dhe kur nuk është shqiptari humbin dukshëm cilësi.

Nuk është rastësi që edhe pas barazimit me Mirandes, faji për pikët e humbura iu vu zëvendësimit të Bares nga trajneri, pasi mesfusha humbi menjëherë forcë dhe saktësi, duke i dhënë hapësira kundërshtarëve që të sulmonin derisa gjetën rrjetën. Kjo tregon edhe një herë qartësisht se sa vlerësohet Bare dhe kontributi i tij për Malagan, e cila përveç aktivizimit të tij me Shqipërinë, në fakt duhet të fillojë të mendojë që tani për fundin e sezonit, kur me siguri në adresë të saj do të fillojnë të vijnë ofertat nga elita për futbollistin shqiptar. /vipsport.al/