Shehu: Dënimi i Teqjes është diskriminim për lirinë e fjalës, mesazh i FSHF për futbollistët

Mungesa e Olsi Teqjes sot te Kukësi nuk ishte pasojë e një dënimi normal, por e pezullimit të lojtarit nga KDS për deklaratat e tija në emisionin “Rubrika Sportive”. Botuesi i Vip Sport, Fation Shehu, argumentoi në studio se ky ishte një kërcënim i qartë i lirisë së fjalës dhe mesazh për futbollistët nga FSHF.

“Të jemi të sinqertë ishte shumë diskriminues për lirinë e fjalës se ajo që tha Teqja është shumë normale në krahasim me llafollogjinë e kampionatit që çfarë nuk dëgjojmë. Të dënohet një futbollist se tha që mësuam që kishte një gjyqtar dhe u ndërrua, për mua është normale. Nuk është ndonjë informacion i fshehtë.

Kjo është bërë në fillim të kampionatit si mesazh për të gjithë futbollistët, mënyra se si është dënuar është skandaloze, është dënuar me dy ndeshje me një nen për kartonin e kuq, me një nen tjetër që thotë që duhet të jenë besnik ndaj Federatës. Nuk e di ku humbi besnikëria me atë që tha Teqja. Për mua është shumë e rëndë se si një futbollist diskriminohet për një fjalë shumë normale, është e rëndë për ata që kanë qenë në fushë e që janë, që të jenë të pasigurt për lirinë e fjalës së tyre”, tha Shehu. /vipsport.al/