Sarri me dhimbje koke, një tjetër sulmues në dyshim për sfidën me Atletiko Madrid

Nuk është një moment i mirë për Juventusin në lidhje me dëmtimet që kanë prekur skuadrën. Fillimisht bardhezinjtë humbën kapitenin Xhorxho Kielini, i cili do të mungojë për pesë deri në gjashtë muaj pas dëmtimit të ligamenteve, ndërsa në sfidën e fundjavës ndaj Fiorentinës në kampionat, lanë fushën para kohe tre titullarë të trajnerit Sarri si, Duglas Kosta, Pjaniç dhe Danilo.

Nëse braziliani është jashtë sfidës së parë në Champions League ndaj Atletiko Madrid, në dyshim mbetet prezenca e Pjaniç dhe Danilo. Ndërkohë, në infermieri është edhe Matia De Shiljo, teksa së fundmi një goditje në kofshë nga ndeshja me Fiorentinën, i ka shfaqur probleme sulmuesit Gonzalo Higuain. Argjentinasi është një tjetër dyshim për premierën europiane, ndërsa Sarri është në alarm.

Në këto kushte, ai që do të përfitojë është Dibala, i cili në këtë sezon ka pasur një minutazh me pikatore. Ndërsa, në rast se konfirmohet mungesa e Higuain, atëherë nga minuta e parë Ronaldo, do të shoqërohet edhe nga Federiko Bernadeski.

/Egi Çabeli-VipSport.al/