Nuk ka “paqe” mes Shaqirit dhe Zvicrës, lojtari refuzon shpjegimet e trajnerit për shiritin

Xherdan Shaqiri e ka vendosur që të mos kthehet në radhët e përfaqësueses së Zvicrës derisa ndaj tij të tregohet respekti i merituar, që do të thotë të cilësohet si lideri i kësaj skuadre dhe t’i japin shiritin e kapitenit. Këtë ide ai ia ka bërë të qartë edhe trajnerit Vladimir Petkoviç në takimin që patën të dy të hënën.

Petkoviç, i cili zakonisht nuk udhëton për të takuar lojtarët, e bëri këtë sakrificë për të kthyer në ekip fantazistin shtatshkurtër i cili ka qenë një nga emrat kryesorë të Zvicrës në këto vite. Ai është munduar të shpjegojë se pse ka zgjedhur Granit Xhakën si kapiten e jo Shaqirin që ishte më i vjetër në moshë dhe kishte dhënë më shumë kontribut me golat e tij.

Por lojtari i Liverpulit nuk ka pranuar këto justifikime, duke bërë të qartë se e meritonte ai shiritin dhe për këtë kontribut të dhënë deri tani duhej vlerësuar nga trajneri dhe Federata Zvicerane. Kësisoj, në Zvicër presin që në tetor lojtari të mungojë përsëri në radhët e përfaqësueses, duke refuzuar thirrjen e saj, edhe pse bëhet fjalë për dy ndeshje shumë të komplikuara ndaj Danimarkës dhe Irlandës. Mediat zvicerane insistojnë se Shaqiri tashmë nuk u përgjigjet as telefonatave të Petkoviç dhe se ky i fundit kishte kërkuar më kot një ndihmë nga Jurgen Klop, pasi tekniku gjerman e kishte cilësuar qëndrimin e Shaqirit si çështje personale në të cilën nuk do të përfshihej. /vipsport.al/