Një mesfushor i ri nga Franca për Dajën, Skënderbeu firmos me kapitenin e Maqedonisë së Veriut U19

Klubi i Skënderbeut vazhdon me politikën e afirmimit të talenteve të rinj, duke ndërtuar një skuadër me elementë shumë cilësorë për të ardhmen. Emra të cilët i janë vënë në dispozicion trajnerit Ilir Daja i cili do të ketë detyrë të përmirësojë ata dhe t’i promovojë.

Më i fundit është Agon Elezi, djaloshi i talentuar 18-vjeçar nga Maqedonia e Veriut, i cili ka nënshkruar sot një kontratë afatgjatë me Skënderbeun. Klubi ka bërë të ditur se kapiteni i Maqedonisë U19, i cili luan si mesfushor qendre, ka nënshkruar për tre vitet e ardhshme me korçarët dhe do t’i bashkohet ekipit të parë.

NJOFTIMI I SKËNDERBEUT

Prej sot, Agon Elezi është zyrtarisht futbollist i KF Skënderbeu.

18-vjeçari ka konkretizuar sot akordin paraprak të arritur me klubin duke firmosur kontratën që e lidh me KF Skënderbeu për 3 vitet e ardhshme.

Elezi u bashkua sot me grupin nën urdhrat e trajnerit Ilir Daja dhe stafit teknik.

Elezi vjen nga ekipi Under19 i ekipit Francez SM Caen dhe është pjesë e përfaqësueses U19 dhe Under21 të Maqedonisë së Veriut. Vlen të theksohet se 18-vjeçari mban shiritin e kapitenit tek kombëtarja Under19 e shtetit fqinj. /vipsport.al/