Ndeshja mes pretendentëve për titull, zbulohen arbitrat e sfidës mes Kukësit dhe Tiranës

Kalendari i javës së pestë në Kategorinë Superiore ka rezervuar një përballje mes dy pretendentëve të drejtpërdrejta për titullin si Kukësi dhe Tirana. Verilindorët prej disa sezonesh qëndrojnë në kuota të larta, ndërsa tashmë iu janë bashkuar edhe bardheblutë. 24-herë kampionët e Shqipërisë kanë bërë një merkato cilësore me objektivin e vetëm trofeun në fund të sezonit.

Deri në këtë pikë, gjërat kanë shkuar mirë për skuadrën e Ardian Memës, teksa skuadra kryeson renditjen me 10 pikë të grumbulluar pa pësuar asnjë humbje. Por, testi i vërtetë do të jetë ndaj verilindorëve për të vërtetuar forcën reale. Sakaq, nga ana tjetër Kukësi, vjen pas disfatës ndaj Bylisit e cila ka lënë një shije të hidhur. Por, nënkampionët do të kërkojnë ta hedhin pas krahëve dhe kundërpërgjigja kërkohet ndaj Tiranës.

Ndërkohë, janë zbuluar edhe gjyqtarët të cilët do të vendosin drejtësi. Takimi më i rëndësishëm i javës së pestë i është besuar kryesorit Eldorian Hamiti, ndërsa asistentë të tij do të jenë Ridiger Çokaj dhe Dojanto Myftaraj.

/Egi Çabeli-VipSport.al/