Moxhi i hedh benzinë zjarrit: Fjalët e Sarrit janë e keqja e futbollit, Konte bëri mirë që iu përgjigj

Luçiano Moxhi duket se nuk ka kapërdirë ende deklaratat e vjetra të Mauricio Sarrit rreth Juventusit dhe tashmë nuk ka humbur rastin për të thumbuar trajnerin e bardhezinjve që pas ndalesës së parë në kampionat. Ai ka akuzuar trajnerin se mundohet të gjejë justifikime kudo për të shpjeguar dështimet dhe në mënyrë të papritur ka mbështetur Antonio Konten, edhe pse ky i fundit është tashmë i ulur në pankinën e Interit.

“Sarri ka vesin që kërkon gjithmonë justifikime, e bën kudo dhe është një e keqe për futbollin. Konte ka bërë mirë që iu përgjigj në atë mënyrë”, ishin fjalët e Moxhit për “Radio Punto Nuovo”.

“Vapa nuk ishte vetëm për Juventusin, por edhe për Fiorentinën e cila luajti shumë mirë. Unë kam menduar gjithmonë se për të ndryshuar mënyrën e lojës, është e nevojshme të ndryshohen lojtarët dhe kjo gjë nuk është bërë. Juventusi ka shumë kampionë në gjendje të zgjidhin ndeshjen në çdo moment, por nuk do të ketë atë ndryshim loje që presin të gjithë. Juventusi ndryshoi Alegrin pasi ishte fundi i një cikli dhe pasi duhej modifikuar loja që të gjithë kontestonin.

Ku e fiton titullin? Mendoj se Napoli, por sidomos Interi, janë shumë më afër Juventusit. Të kaltrit janë përforcuar shumë dhe kanë një trajner të madh”, ishte verdikti i ish-drejtuesit të Juventusit i cili me sa duket nën drejtimin e Sarri nuk e sheh më dominuese ish-skuadrën e tij. /vipsport.al/