Luhet për kreun e klasifikimit, Kukësi ndryshon sërish çmimin e biletave

Kukësi dhe Tirana do të përballen të shtunën në “Elbasan Arena” në një ndeshje ku synohet vetëm kreu i klasifikimit. Aktualisht, bardheblutë janë kryesues me 3 pikë më shumë se Kukësi ndërkohë që verilindorët synojnë që të barazojnë ose të paktën të mos lejojnë Tiranën që të shkëputet edhe më shumë në ndeshjen direkte mes tyre.

Fillimisht, Kukësi kishte menduar që ndeshjen ta luante në Kamëz, megjithatë FSHF nuk i ka dhënë një licencë duke qenë se stadiumi i Kamzës nuk plotëson kushtet e nevojshme. Kjo ka bërë që të zgjidhet Elbasani që në vitet e fundit ka qenë zgjedhje e parë për Kukësin.

Në prag të këtij takimi, klubi verilindor ka publikuar edhe çmimin e biletave dhe mund të thuhet se sërish ka çmime të kripura. Një biletë në tribunën VIP kushton 2 mijë lekë të reja, ndërsa në tribunën kryesore 1 mijë lekë. Në çdo pjesë tjetër të stadiumit, bileta kushton 500 lekë.

Duke menduar numrin e pakët të tifozëve që frekuentojnë stadiumet në Shqipëri, rritja e çmimit i largon edhe më shumë. Në shumë ndeshje, Kukësi i ka lënë dyert e hapura apo edhe ka pasur çmime simbolike por natyrisht, kjo është një ndeshje me rëndësi më të veçantë. /Erjon Allaraj-VipSport.al/

Çmimet: 

Tribuna VIP / 2000 lekë

Tribuna A – B / 1000 lekë

Tribuna D – E – F – C – G / 500 lekë