J-Lo dhe Shakira, dy këngëtaret përzgjidhen për spektaklin më të madh sportiv në botë

Pushimi në ndeshjen në finalen e SuperBowl në futbollin amerikan është kthyer në spektaklin sportiv më të ndjekur në botë. Këngëtarë me famë ndërkombëtare përzgjidhen të këndojnë falas në eveniment, duke e cilësuar një nder të madh dhe përllogaritet se ato pak minuta nën tingujt e muzikës janë ndër më të ndjekurit çdo vit në historinë e spektakleve në aktivitetet sportive.

Këtë vit, dyshja e përzgjedhur është shumë e veçantë, pasi NFL ka gjetur akordin me dy këngëtare shumë të njohura. Shakira dhe Xhenifer Lopez do të jenë ato që do të argëtojnë rreth 800 milionë teleshikues në të gjithë botën në pushimin e ndeshjes në finalen e SuperBowl të këtij edicioni. Konfirmimi erdhi nga vetë NFL me një postim në rrjetet sociale, të cilit më pas iu shtuan edhe ato të dy këngëtareve.

“Nuk ka asgjë më të madhe se kjo”, tha Shakira e cila ka kënduar edhe në finalet e Kupës së Botës në futboll më përpara, ashtu si edhe J-Lo. “Do të ketë fishekzjarrë”, premtoi nga ana tjetër Xhenifer Lopez për shfaqjen e cila në edicionin e kaluar pa në skenë grupin “Maroon 5”. /vipsport.al/