Intervista për “VipSport”, Rapo: Gjyqtarët të mos vendosin ndeshjet, Luftëtari nuk e diskuton mbijetesën

Luftëtari barazoi në shtëpi 1-1 me Laçin, ndërsa gjirokastritët në tri javët e fundit vijojnë me ecurinë e rezultateve pozitive. Në Gjirokastër, me ardhjen e trajnerit grek Marantas, duket sikur skuadra është futur në “shinat e duhura”, ndërsa po vijnë edhe rezultatet pozitive. Luftëtari ka 5 pikë aktualisht, por barazimi me Laçin ka “djegur” shumë, kjo për faktin se skuadra ka merituar 3 pikët dhe gjyqtari ka dhënë një penallti që nuk duhej të jepej!

Donald Rapo, kapiteni i Luftëtarit që realizoi eurogolin dhe që është nga më të mirët këtë sezon për bluzinjtë, në një prononcim për “Vipsport”, thekson se skuadra ka rritje dhe meritonte fitoren me Laçin.

-Rapo, ja keni marrë dorën eurogolave, shënuat ndaj Laçit, identik nga ku keni shënuar edhe vjet?

Rastësi e bukur, por unë kur jam në një pozicion që kam hapësirë afër zonës godas, sepse e di që do të shkoj në portë, sidomos me të majtën. U gëzova shumë sepse ishte goli i parë për këtë sezon, e kisha tentuar edhe në ndeshjen e tjera dhe erdhi në momentin e duhur. Por nuk na lanë që të festonim…

-Pse e thoni këtë?

Po u barazua rezultati jo për fajin tonë, gjyqtari dha një penallti që për mua si kapiten nuk ishte. Nuk e di se ku e pa gjyqtari dhe anësorët. Më vjen shumë keq, sepse na humbën dy pikë. Siç u pa edhe vjet gara vendoset në fund për 1 ose dy pikë. Gjyqtarët duhet që të jenë më të kujdesshëm. Ne, si skuadër mundohemi që të luajmë futboll dhe të jemi korrekt. Nuk ka pse gjyqtarët të bëhen faktor në asnjë ndeshje sepse tallen me djersën e lojtarëve, punën e trajnerëve dhe investimet. Tallen me qytetet ashtu dhe futbolli nuk rritet kurrë!

-Në tri javët e fundit, Luftëtari duket më ndryshe. Pse?

Po fillimi dihet si ishte për ne , organizimi i vonshëm, ndryshimet e trajnerëve bëjnë të vetën dhe ndikuan. Por, në tri javët e fundit, Luftëtari mendoj se po funksionon si skuadër, po zhvillojmë lojë dhe po vijnë edhe pikët, jo vetëm në fushën tonë, por edhe në transfertë.

-Cilat janë objektivat e Rapos këtë sezon?

Duhet që të vazhdojmë të luajmë kështu, pse jo edhe më mirë. Unë këtë vit dua që të shënoj të paktën 7 gola. Besoj se do t’ia dal.

Intervistoi: Erjon Saliu/Vipsport.al/