“Hakmarrja” e Abazajt ndaj kritikave dhe këshilla e veçantë për Gjicin: Tani jam në 70% të formës

Kristal Abazaj është kthyer menjëherë protagonist në Kategorinë Superiore edhe pse pranon se nuk është ende në maksimumin e tij. Futbollisti shënoi sot ndaj Tiranës, duke treguar se po i afrohet pak nga pak formës optimale.

Në SuperSport pas sfidës, Abazaj theksoi se ishte duke iu afruar formës së tij më të mirë, edhe pse nuk ishte në maksimumin e mundshëm ende.

“Është e vërtetë që kthehem pas një kohe shumë të gjatë të luaj në fushën e lojës. Sa i përket fjalëve, jemi profesionistë dhe do t’i përballojmë të gjithë, do të përpiqemi t’i kalojmë me pozitivitet dhe me punë. Duhet të arrijmë t’u tregojmë atyre që vlejmë. Nuk jemi aty ku kemi qenë, por vlejmë.

Në verë ishin fjalë, por sa i përket transferimit tim te Kukësi, nuk jam bërë pishman sepse presidenti ka investuar shumë dhe me të drejtë kërkon shumë nga ekipi. Por të shikojmë nga java në javë tani se edhe ekipi është i ri dhe presim të rritemi.

Presidenti normalisht kërkon shumë nga ekipi sepse ka investuar shumë. Ai kërkoi mendimin tim dhe i thashë “president mund të ikësh se në 7 fillon ndeshja”. Ai qeshi dhe iku.

Mund të them se jam në 70%, pasi formën nuk e kam shumë të mirë meqë edhe ngarkesën nuk e kam marrë të plotë në fazën përgatitore. Po e bëj këtë te Kukësi, po stërvitem me intensitet bashkë dhe veçmas grupit.

Gol kundër ekipit me të cilin jam tifoz? Unë jam profesionist dhe jap maksimumin për ekipin që përfaqësoj dhe kaq”, tha Abazaj. /vipsport.al/