Grumbullohet edhe Shqipëria U17, ftohet sulmuesi i Parmës për miqësoret para Europianit

Kombëtarja shqiptare e futbollit  U17, do të zhvillojë në muajin tetor dy ndeshje të fundit përgatitore për pjesëmarrjen në Kampionatin Europian të kësaj grupmoshe. Kuqezinjtë e drejtuar tashmë nga Elvin Beqiri, do të mundohen të thyejnë trendin negative të viteve të fundit, pasi që nga edicioni 2013-2014 nuk arrin të kalojë fazën e parë në grupe.

Për të përgatitur grumbullimin përfundimtar, kuqezinjtë do të ndeshen më datë 13 dhe 16 tetor me përfaqësuesen e Malit të Zi, ku do të shihet edhe një herë grupi i lojtarëve të seleksionuar deri tani dhe kandidatët e tjerë potencialë për grumbullimin e muajit nëntor kur zhvillohen edhe ndeshjet e Europianit.

Baza e përfaqësueses për aktivitetin pritet të jetë përsëri me lojtarë që luajnë jashtë vendit tonë, në akademitë e vendeve fqinje si Italia apo Greqia, ndaj këto miqësore shërbejnë për të bashkuar grupin e lojtarëve. Një nga emrat që ka marrë ftesën, sipas konfirmimit të vetë klubit të Parmës, është sulmuesi i ekipit U17 të këtij klubi, Klajdi Lusha. Shqipëria do të luajë në kualifikueset e Europianit kundër Portugalisë, Ukrainës dhe Gjeorgjisë. /vipsport.al/