Frashëri: Nuk ishte hakmarrje ndaj Kukësit, nuk bëri sa duhej me potencialin që ka

Stivi Frashëri nuk e sheh fitoren e Teutës ndaj Kukësit si një hakmarrje personale ndaj ish-skuadrës nga e cila u largua në verë. Portieri i durrsakëve deklaroi në “Rubrika Sportive” se sfida me Kukësin kthente ekipin në pozitat që synonte.

“Partizani është më i qetë në fushë se Tirana e aty është pjesa që përfiton Partizani se luan më me logjikë. Me Tiranën dolëm barazim, ishte ndeshje e vështirë, ishte më në formë. Besoj se është herët të themi se është pretendent titulli, rivali më i vështirë për ne besoj se do të jetë Partizani se ka edhe euforinë e momentit, besoj se do të jetë më i vështirë.

Ne jemi ekip që duam të luajmë me top poshtë, por kushtet e fushës ndaj Kukësit nuk ishin të mira, patëm probleme me qarkullimin e topit. Kemi pasur probleme me dëmtimet, mezi prinim kthimin e Kallakut. Në pjesën e parë problemi ishte lidhja mes mesfushës dhe sulmit. Kur hyri Kallaku gjuanim më shumë për tre pikët, ishte ndeshje e balancuar. Kukësi me potencialin që ka nuk bëri sa duhej.

E morëm pak më shtruar. Javën e kaluar ishim të bindur që do të fitonim, ishte përgatitur gjithë java që do të marrim tre pikë. Por Çyrbja nuk është ende në maksimum, Kallaku u kthye, ka lojtarë që nuk arritën të ambientohen me grupin, duan kohën e vet. Mua më kënaq pjesa e mbrojtjes se jemi shumë solid dhe të shohim përpara.

Hakmarrje ndaj Kukësit? Jo, nuk mund ta them, aspak, kam kaluar shumë mirë me Kukësin, i respektoj mirë të gjithë. Shoh pjesën si profesionist dhe i respektoj, jap maksimumin, se do të kem Kukësin, Partizanin, Tiranën. Është ndeshje, fokusohem te loja ime. Ndjehem shumë mirë te Teuta, i lumtur, më kanë pritur shumë mirë, ma kanë bërë gjithçka të lehtë. Një aventurë e re më bënte mirë edhe mua nga ana psikologjike.

Momentalisht jemi të kënaqur, kemi gabuar dy javë më parë me Vllazninë në shtëpi, duhej të merrnim tre pikë dhe nuk e shfrytëzuam. Me kthimin te fitorja, pak a shumë jemi kthyer dhe psikologjiksiht jemi më mirë”, tha Frashëri. /vipsport.al/