Firot nga Luftëtari nuk kanë fund, largohet edhe më i rëndësishmi jashtë fushës së blertë

Luftëtari i këtij sezoni ka njëmijë probleme dhe duket se problemet po shtohen dita-ditës. Pas largimit të shumë futbollistëve në merkaton e verës, një tjetër pjesëtar i stafit bluzi i ka dhënë lamtumirën skuadrës. Bëhet fjalë për mjekun e ekipit, Juxhino Korbeci i cili ka qenë një nga më të rëndësishmit te bluzinjtë, si në sezonin e vjetshëm kur luanin për mbijetesë, ashtu edhe në vitin kur bënin histori duke u kualifikuar në Europë.

Ka qenë vetë Korbeci, ai i cili e ka njoftuar diçka të tillë në profilin e tij në “Facebook”, ku edhe nuk ka harruar të falënderojë futbollistët me të cilët ka bashkëpunuar si edhe trajnerët, e njëkohësisht duke përjashtuar nga ky falënderim presidentët dhe drejtuesit e klubit. Problemet financiare kanë qenë dhe mbeten pengesa më e madhe në Gjirokastër, duke bërë që të gjithë të shohin për një mundësi më të mirë.

Postimi në Facebook:

“Merr fund një eksperiencë plot gëzime, trishtime, mund, djersë, sakrifica.

Falënderoj nga zemra çdo pjesëtar “klase punëtore” te ekipit i Luftëtarit pasi japin shumë për këtë ekip dhe vlerësohen shumë pak në të dyja drejtimet, si morale ashtu dhe monetare.

Falënderoj të gjithë lojtarët dhe trajnerët që nga 2017 e në vazhdim, pasi respekti dhe bashkëpunimi ka qenë reciprok dhe maksimal, ju vlerësoj shumë. S’dua të përmend emra pasi janë me të vërtetë shumë. Keni qenë për mua një familje e dytë.

Do jem tifozi tuaj i parë që do ju mbështes, jo nga shkallët e stadiumit por nga Autoambulanca. Ju dua shumë. Do më mungoni”, shkruan mjeku i ekipit, i cili ka pasur edhe rolin e fizioterapistit dhe ndihmës së shpejtë. /Erjon Allaraj-VipSport.al/