Debati i portierëve, Bajerni i shpall luftë Federatës. Hënes: Tani të presin pak zjarr nga ne

Akuzat e Mark Andre Ter Shtegen se ishte “keqtrajtuar” pasi ishte lënë në stol në vend të Manuel Nojer në kombëtaren gjermane, kanë bërë që në Gjermani të shpërthejë një debat i ndezur se cili prej portierëve e meriton të jetë numri 1 në përfaqësuese. Te Bajern Mynih, nuk kanë pëlqyer në këtë mesele sidomos faktin se është lejuar që çështja të bëhet publike dhe pas suksesit të mbrëmshëm në Ligën e Kampioneve, Uli Hënes shpenzoi më shumë kohë duke folur për këtë temë se për ndeshjen, ndërsa i shpalli luftë të hapur Federatës.

“Mendoj se është një shaka, e mbi të gjitha mendoj se shtypi në Mynih nuk është në rregull. Shtypi në Gjermaninë Perëndimore mbështet Ter Shtegen, sikur ai të kishte fituar 17 Kampionate Botërorë dhe nuk shoh ndonjë mbështetje nga shtypi i Gjermanisë Jugore. Më duket e pabesueshme që është bërë publik ky debat pasi Ter Shtegen nuk ka arsye pse të kërkojë të luajë,.

Në portë është ndryshe nga fusha, duhet të jetë e qartë kush luan. Manuel Nojer është numri 1. Ai ka qenë portieri më i mirë në botë për shumë vite dhe ka qenë jashtë loje për pak kohë si pasojë dëmtimesh. Por është e qartë se nëse ai kthehet në formë, siç është tani, nuk ka diskutim se vetëm ai mund të jetë numri 1.

Prisja më shumë mbështetje nga Federata. Vazhdimisht kemi teatro nga ajo. Fillimisht me largimin e tre futbollistëve, tani e njëjta gjë me Manuel Nojer. Tani lejuan që një lojtar të flasë publikisht për diçka që duhej ta diskutonte vetëm me trajnerin Lëv. Nuk do të pranojmë më që lojtarët tanë të dëmtohen pa arsye. Ter Shtegen është i mirë, por Nojer është shumë më i mirë dhe më me eksperiencë. Ai mund të luajë për sa kohë që është i shëndetshëm. Tani Federata të presë pak zjarr nga ne”, premtoi Hënes, në një debat i cili po ndizet gjithnjë e më shumë. /vipsport.al/