Teuta cakton miqësoren e fundit “korçare”, në fundjavë kthehet në shtëpi

Klubi i Teutës po finalizon përgatitjet për sezonin e ri në kampin stërvitor që ka zhvilluar në Korçë, ku trajneri Bledi Shkëmbi i ka dhënë shumë rëndësi formës fizike të lojtarëve para startit të një sezoni shumë të lodhshëm e me një kalendar të ngjeshur. Durrsakët kanë pretendime të mëdha për këtë sezon ndaj i japin rëndësi çdo detaji për përgatitjet e tyre të cilat do të finalizojnë këtë javë “etapën korçare” për t’u mbyllur në Durrës në javën para fillimit të Superiores.

Në këtë javë të fundit qëndrimi në Korçë, skuadra do të zhvillojë një tjetër miqësore për të parë gjendjen e lojtarëve. Durrsakët kanë gjetur kundërshtarin e radhës dhe të mërkurën do të luajnë përballë Devollit një ndeshje kontrolli po në qytetin e Korçës, në mënyrë që të kenë idetë më të qarta për situatën e çdo lojtari para fillimit të sezonit të ri.

Më pas, në fundjavë skuadra do të kthehet në Durrës dhe që nga e hëna e javës së ardhshme, do të nisë përgatitja specifike për duelin e javës së parë të kampionatit që sheh ekipin e Shkëmbit të luajë kundër Bylisit. /vipsport.al/