Te Flamengo ishin gati t’i plotësonin edhe klauzolën “Donaruma”, por Baloteli zgjedh Italinë

Mario Baloteli është gati të kthehet në Itali dhe pritet që në ditët e ardhshme të firmosë për klubin e Breshias i cili në këtë edicion do të luajë në Serinë A. Sulmuesi italian ka mbyllur kontratën me Marsejën dhe ishte futbollist i lirë për të vazhduar karrierën e tij.

Edhe pse ka zgjedhur Breshian, deri në momentin e fundit Baloteli ishte në bisedime edhe me brazilianët e Flamengos, të cilët i kishin bërë oferta shumë të rëndësishme ekonomike dhe ishin gati të plotësonin edhe klauzolat e çuditshme që kishte vendosur sulmuesi.

Flamengo fillimisht i ofroi 5 milionë dollarë në vit, me një kontratë dyvjeçare, ndërsa Breshia i ofron një shifër më të ulët për të luajtur në Serinë A. Ndërkohë, Baloteli u kërkoi brazilianëve që të blinin edhe vëllain e tij, Enok, që të luante në radhët e Boavistës, klub i cili gjendet në kategorinë e katërt braziliane dhe funksionon si filial për Flamengon.

Ai u kërkoi që vëllait të tij, i cili është sulmues, t’i garantoheshin minimalisht 10 ndeshje në sezon gjatë qëndrimit në klub, kusht të cilin Flamengo e pranoi. Gjithsesi, në fund Baloteli vendosi të kthehej në shtëpi, pasi Breshia është qyteti ku është rritur. /vipsport.al/