Shorti të premten / Lion, Volfsburg, PSG, Barça apo Bajern. Të gjitha rivalet e mundshme të Vllaznisë e Mitrovicës

Vllaznia dhe Mitrovica kanë shkruar historinë sot duke kaluar fazën në grupe të Ligës së Kampioneve për të vazhduar me atë të eliminimit direkt, një arritje e rëndësishme për futbollin e femrave.

Por tani përballë do të jenë skuadra të një niveli tjetër, pasi bëhet fjalë për elitën e futbollit europian sa i përket futbolli të femrave. Në shortin që hidhet të premten, për fazën e parë me eliminim direkt, si Vllaznia, ashtu edhe Mitrovica, do të vihen përballë një prej 16 skuadrave më të forta në kontinent pasi dy ekipet shqiptare gjenden në vazon e dytë të shortit, atë të më të dobëtave.

Përballë janë emra të mëdhenj si Lioni që dominon prej vitesh Ligën e Kampioneve, apo Volfsburgu, pa harruar këtu PSG, Barcelonën, Bajern Mynih, Mançester Sitin apo Atletiko Madrid, të gjitha klube të cilat përveçse kanë traditë në futbollin e femrave, kanë krijuar edhe mbështetje të gjerë nga tifozeritë përkatëse.

Në vijim janë të gjithë kundërshtarët e mundshëm në shortin e të premtes për ekipet shqiptare:

Lion (fitues në fuqi), PSG – Francë; VfL Volfsburg, Bajern Mynih – Gjermani; Barcelona, Atletiko Madrid -Spanjë; Slavia Praga, Sparta Praga – Republika Çeke; Mançester Siti – Angli; Borndbi, Fortuna Hjorring – Danimarkë; Zyrih – Zvicër; BIIK Kazigurt – Kazakistan; Gllasgou Siti – Skoci; Tuente – Holandë; Fiorentina – Itali.

Ndeshjet e fazës së parë me eliminim direkt luhen me 11/12 shtator dhe 25/26 shtator. /vipsport.al/