Rikthehet tradita në Fier, ja kush pritet që të jetë “bomberi’ i ri!

Në saj të punës së mirë që është bërë në 2-3 sezonet e fundit, ku edhe një herë drejtuesit më të lartë të klubit fierak kanë kthyer vëmendjen nga akademia, duke iu besuar lojtarëve minutash edhe në skuadrën e parë, ka bërë që sezoni i ardhshëm ta gjejë Apoloninë me 10 lojtarë nga të rinjtë në organikë.

Kujtojmë që moshat fierake në sezonin e shkuar bën një garë mjaft të mirë, e madje duke spikatur, aq sa Apolonia U-19 doli në Superiore, ashtu sikurse edhe U-15 fitoi titullin kampion në rang kombëtar, pa harruar kurrsesi edhe punën e mirë që u bë me U-17 që iu afruan shumë titullit.

Qendërsulmuesi Mario Gjata ka dhënë një kontribut të jashtëzakonshëm për Apoloninë U-19, që u ngjit në Superligë sezonin që lamë pas, por edhe me ekipin e parë ka lënë gjurmë.

Shpesh është “penalizuar” nga ekipi i parë, për shkak të aktivizimit me të rinjtë e Apolonisë, ngaqë kjo e fundit kishte objektiv Superligën që e arriti me sukses. Megjithatë, 19-vjeçari është futbollist me premisa të qarta.

Qysh 17 vjeç ka qenë pjesë e ekipit të parë, gjithmonë këmbëngulës dhe me shpirt gare, me një statistikë të konsiderueshme tek Apolonia e parë për moshën që ka: 1395 minuta dhe 3 gola në kampionat, 235 minuta dhe 3 gola në Kupë.

E.S./Vipsport.al/