Liga e Kampionëve/ Ekipi që mahniti sezonin e kaluar rrezikon kualifikimin, në lojë edhe dy skuadra të tjera

Në mbrëmjen e sotme do të plotësohet edhe panorama e ekipeve të cilat do të marrin pjesë në fazën e grupeve të Ligës së Kampionëve, ndërkohë që ditën e nesërme do të hidhet edhe shorti për të startuar pjesën më emocionuese të kompeticionit më të rëndësishëm europian për klube. Kështu, pas barazimit pa gola në ndeshjen e parë, Ajaksi duhet medoemos të marrë fitoren për t’u kualifikuar ndaj qipriotëve të Apoel.

Edhe pse ishin një nga skuadrat surprizë të sezonit të kaluar, teksa ishin prezentë deri në gjysmëfinale, tashmë skuadra e drejtuar nga Ten Hag rrezikon pjesëmarrjen. Ndoshta, në këtë pikë kanë ndikuar edhe largimi nga ekipi i dy elementëve kryesorë si mesfushori De Jong dhe mbrojtësi De Ligt. Sakaq, nga ana tjetër Apoeli, nuk ka presion dhe do të provojë të befasojë duke pasur mundësinë se kualifikohet edhe nëpërmjet barazimit me gola.

Ndërkohë, edhe dy sfidat e tjera të mbrëmjes mbeten të hapura, teksa Klub Bryzh pret Lask Linz, ndërsa Sllavia e Pragës përballet me Kluzh. Megjithatë, si Bryzh edhe Praga kanë avantazhin pasi kanë fituar 0-1 në takimin e parë. /Egi Çabeli-VipSport.al/

Ndeshjet:

21:00 Ajaks- APOEL
21:00 Klub Bryzh- LASK Linz
21:00 Sllavia Pragë- CFR Kluzh