Intervista për “VipSport”/ Mala: E ndjeva që do të shënoja gol, me të njëjtën grintë edhe në kampionat

Esat Mala arriti të shënonte në Superkupën e Shqipërisë që në minutën e 6, duke i dhënë skuadrës së tij avantazhin ndaj Kukësit. Ky gol, në fakt ishte pasues i 3 golave të tjerë për skuadrën e tij të shënuar nga Braun dhe në një intervistë për “VipSport”, Mala u shpreh se e ndjente që do të shënonte gol ndërkohë që pranoi se duhet të jetë e njëjta grintë edhe në kampionat.

“Goli? Më vjen mirë që shënova golin e parë dhe ndihmova ekipin ta nisim ku e lamë. E ndjeva këtë gol dhe më vjen keq që nuk shënova edhe golin e dytë. Jam i lumtur. Kishim dominim gjithë ndeshjen por na kapi një ngërç, por më vjen mirë që shënuam golin e barazimit dhe pastaj bëmë mirë në shtesë.

Ndeshja në kampionat? Entuziazmi duhet të jetë i njëjtë, ashtu si grinta dhe dëshira.

Ndryshimet mes këtij Partizanit dhe Partizanit kampion? Është një pyetje që nuk mund ta diskutoj. Jemi një ekip i ri pasi kemi pasur prurje dhe largime, por besoj se gjithçka do të shkojë mirë”, u shpreh Mala. /Erjon Allaraj-VipSport.al/