EURO 2020 / Shqipëria nuk ka publikuar ende se ku do të luajë, Franca cakton datën e prezantimit të listës

(Keq) Organizmi në FSHF nuk krijon probleme vetëm për kampionatin shqiptar të futbollit, por edhe me atë që ajo vetë cilëson si parësore, kombëtaren kuqezi. Kur mbetet vetëm një muaj nga ndeshja kundër Islandës në vendin tonë për kualifikueset e Euro 2020, institucioni i futbollit nuk ka zyrtarizuar ende impiantin se ky do të luhet sfida, në kontrast të plotë me rivalët e më saktësisht pretendentët e Francës të cilët kanë treguar se si punojnë profesionistët.

Francezët, edhe pse kanë dy ndeshje të lehta në letër për ta ndaj Shqipërisë dhe Andorrës, nuk i kanë lënë asgjë rastësisë dhe në këtë fundjavë, skautë të kombëtares kanë qenë të pranishëm në ndeshjet e kampionateve angleze dhe franceze ku gjenden futbollistët kryesorë. Vetë ndihmëstrajneri  Gui Stefan, ka qenë i pranishëm në ndeshjen Mançester Junajtid – Çelsi, për të parë në veprim disa lojtarë të ndryshëm në radhët e dy skuadrave si Pogba, Zouma, Zhiru, apo Kante.

Pasi ka mbaruar monitorimi, sot është bërë e ditur zyrtarisht nga Federata Franceze se lista e lojtarëve do të bëhej publike më datë 29 gusht, pasi trajneri kishte një ide të qartë mbi kandidatët potencialë dhe në ditët në vijim do të ngushtonte listën deri në prezantimin e të përzgjedhurve edhe në varësi të gjendjes fizike.

Ndërkohë, në Shqipëri, FSHF nuk ka dalë zyrtarisht të pranojë se ndeshja mes kuqezinjve dhe Islandës më 10 shtator do të jetë e pamundur të zhvillohet në stadiumin e ri i cili nuk ka mundësi të mbarojë brenda asaj periudhe, me apo pa sheshin përpara. Ajo që është më e rëndësishme, askush nuk ka dalë zyrtarisht t’u tregojë tifozëve nëse sfida do të luhet në Elbasan, ku ka më shumë mundësi për lehtësi gjeografike, apo në Shkodër ku është një impiant i cili është treguar gjithmonë i ngrohtë me kuqezinjtë. Nëse tribunat do të jenë të boshatisura pasi tifozët nuk kanë arritur të programojnë siç duhet udhëtimin në një prej këtyre dy qyteteve për të ndjekur sfidën, në FSHF duhet ta kërkojnë përgjegjësinë te vetja… /vipsport.al/