VIDEO / Ish-sulmuesi i Kamzës shënon për surprizë në Champions, tani mund të evitojë Partizanin

Saburtalo e Gjeorgjisë ka dhuruar një nga surprizat e këtij edicioni në Ligën e Kampioneve, të paktën sa u përket ndeshjeve të para në turin eliminator. Skuadra e cila debutonte në arenën ndërkombëtare sot, ka mundur Sherif Tiraspol me rezultatin 3-0 në fushën e klubit moldav, që shihej si favorit absolut për të kaluar turin.

Përballë skuadrës së re të Liridon Latifit që luajti 90 minuta, vihej një emër i njohur në Superioren e sezont ttë fundit, Ognjen Roloviç, i cili luajti një gjysmë edicioni me fanellën e Kamzës para se t’i jepte lamtumirën Shqipërisë për t’u transferuar pikërisht të gjeorgjianët.

Roloviç ishte në fushën e lojës si titullar dhe shënoi golin e parë të ndeshjes të cilën pakkush e mendonte se mund të mbyllej në këtë mënyrë e për më shumë me një diferencë të pastër, pasi Sherif vinte nga vazo e parë.

Një rezultat që mund të ndikojë direkt edhe planifikimin e ecurinë e Partizanit në Europë. Kjo pasi humbësi i këtij çifti shkon në turin e dytë të Ligës së Europës dhe ndeshet me humbësin e çiftit Partizani-Karabak. Në rast eliminimi të të kuqve, mendohej se do të përballeshin me ekipin gjeorgjian, por rezultati i ndeshjes së sotme bën të qartë se në rast disfate në Baku, të kuqtë do të përballen me moldavët e Sherif dhe Latifin, pasi kualifikimi i tyre i mëtejshëm duket thuajse i pamundur. /vipsport.al/