Sulmuesi i Kombëtares bëhet me ekip të ri, firmos në Serinë B

Xhakomo Vrioni është bërë zyrtarisht pjesë e skuadrës së Çitadelës në Serinë B. Sulmuesi i Kombëtares, sezonin e kaluar ishte pjesë e Venecias, por pasi përfundoi huazimin u rikthye te klubi që zotëron kartonin e tij, Sampdoria. Në sezonin e kaluar, 20-vjeçari u aktivizua në 24 paraqitje me Venecia, duke shënuar edhe një gol.

Ndërkohë, Sampdoria dhe Çitadela prej disa ditësh kishin nisur bisedimet për transferimin e Vrionit, teksa në ditën e sotme gjithçka ka përfunduar sipas parashikimeve dhe sulmuesi është zyrtarisht lojtar i Çitadelës.

Njoftimin zyrtar e ka bërë klubi i Çitadelës, nëpërmjet rrjeteve sociale, ndërsa Vrioni ka kaluar me sukses edhe vizitat mjekësore, ndërsa do t’i bashkohet shokëve të rinj të ekipit për stërvitjen e pasdites. Kështu, Vrioni përgatitet të nisë aventurën me skuadrën e re, ndërsa Çitadela mund t’i japë minutazhin e duhur për të shprehur potencialin e plotë në fushë.  /Egi Çabeli-VipSport.al/