Skuadra e shqiptarëve fiton të parën në Ligën e Europës, Rejnxhërs argëtohet me modestët

Hajduk Split ka marrë një rezultat të rëndësishëm sot në Ligën e Europës, duke fituar në transfertë përballë maltezëve të Gzira. Ekipi i shqiptarëve në Kroaci pasi në radhët e tij ka 4 të tillë, është favorit për të kaluar në turin tjetër të turneut përballë modestëve ishullorë të cilët i mundi me shifrat 2-0.

Në këtë sfidë, vetëm Ardian Ismajli e nisi duelin sit titullar, ndërsa Françesko Tahiraj u aktivizua si zëvendësues, për të dhënë kontributin e tij në 20 minutat e fundit të duelit i cili ka një rëndësi të veçantë për klubin kroat pasi ka vënë si qellim në këtë edicion që të luftojë për pjesëmarrjen në fazën në grupe të turneut.

Goli i Giurkso në fundin e pjesës së dhe ai i Dolçek në shtesën e ndeshjes, i dhanë suksesin 2-0 ekipit të Hajduk që mund të mendojë i qetë për sfidën e kthimit ku nuk është çudi që të ketë hapësira edhe për dy shqiptarët e tjerë të këtij ekipi, Sahiti dhe Dellova.

Ndërkohë, Rejnxhërs i Eros Grezdës ka mundur lehtësisht 4-0 në transfertë modestët e St. Xhozefs, të cilët eliminuan Prishtinën në turin paraeliminator. Grezda nuk ishte i pranishëm pasi është lënë jashtë listës për turin e parë, në pritje që të sqarohet e ardhmja e tij e cila me shumë siguri është larg klubit skocez. /vipsport.al/