Presidenti i Napolit, De Laurentis: Nuk e ndërroj Insinjen me Ikardin, ai do kërkojë të shkojë te Juventusi

E ardhmja e Mauro Ikardit është e përcaktuar. Ajo do të jetë larg Interit, mirëpo fakti që sulmuesi nuk kërkon të largohet nga Italia, duket se ka ndezur një garë mes Juventusit dhe Napolit për shërbimet e argjentinasit. Klubi zikaltër do t’ia dorëzonte më kënaqësi Ikardin, napoletanëve, duke qenë se nuk kërkon të përforcojë një rival historik si bardhezinjtë.

Megjithatë, në mes është edhe dëshira e lojtarit. Dhe këtë pjesë duket se e ka sqaruar përfundimisht presidenti i Napolit, Aurelio De Laurentis. Numri një i të kaltërve, u shpreh se është dakord me Ançelotin, i cili tha se nuk e ndërron Insinjen për Ikardin, pasi në fund sulmuesi i Interit do të kërkojë të shkojë te Juventusi. “ Ka të drejtë Ançeloti. Ikardi në fund do të dëshirojë të shkojë te Juventusi. Edhe unë, si trajneri, preferoj Insinjen. Kemi nevojë për të, ndërsa përpara kemi edhe Milik me Mertens”, tha presidenti.

Ndërkohë, De Laurentis nuk e mohoi se e ka kërkuar Ikardin te Napoli. “ Nuk e mohoj. Askush nuk mund ta injoroj talentin e tij. Ikardi është shumë i fortë, por kemi folur aq shumë për të dhe tani duket shumë më i vjetër se 26 vitet e tij. Duke e parë nga larg situatën, më duket se është menaxhuar keq dhe nuk ka kuptuar rëndësinë e rolit që mbulon. Por, konsiderata ndaj tij nuk diskutohet”, tha De Laurentis.

/Egi Çabeli-VipSport.al/