Një pjesë pa gola e rasti i Solomon, kapiteni i Karabak: Trajneri na tregoi në pushim çfarë të bënim

Rashad Sadikov, kapiteni i Karabak, e ka cilësuar si shumë të vështirë fitoren e skuadrës së tij përballë  Partizanit, edhe pse të merituar. AI ka përgëzuar të kuqtë për lojën e zhvilluar dhe tha se skuadra e tij ishte me fat që gjeti shpejt golin në pjesën e dytë, edhe pse kishte marrë instruksionet e duhura se çfarë të bënte me kalimin e minutave.

“Pas ndeshjes së parë pritnim një ndeshje të tillë. Nuk më kujtohet që në ndeshjen e parë të kemi bërë një paraqitje kaq të mirë. Ne duhej të shtonim shpejtësinë në pjesën përpara. Kundërshtari u mbrojt mirë. Për fat të mirë në pjesën e dytë zhvilluam një lojë të mirë.

Goli i parë erdhi në kohën e duhur. Përndryshe skuadra mund të përballej me stres. Gjatë pushimit, trajneri na tha të mos nxitoheshim dhe të mos shikonim rezultatin meqë mund të shënonim edhe në minutën e 90, apo në kohën shtesë”, shpjegoi Sadikov.

I ngacmuar nëse fati i ndeshjes u vendos nga gjuajtja e Solomon, ai argumentoi se ekipi i tij kishte bërë më shumë raste të tilla sesa Partizani. “Nëse ata kishin një momenr të tillë, ne kishim 4 apo 5. Ky është futbolli dhe në futboll ka ndeshje ku një skuadër ka vetëm një shans të tillë për të shënuar. Nëse ata do të shënonin, ne do të kishim dhe 15 minuta të tjera për të gjetur përsëri rrjetën. Ne ishim gati për këtë. Sigurisht, mund të jesh gati për gjithçka, por pastaj duhet ta vësh në zbatim” tha mbrojtësi veteran. /vipsport.al/