Ish-trajneri i Kukësit këshillon Karabak: Shqiptarët të famshëm për kurajën, mos e çoni me penallti

Naxhi Shensoj, një emër që njeh futbollin shqiptar ku ka drejtuar Bylis e Kukësin, si dhe atë azer ku ka drejtuar Turan, ka bërë analizën e tij për ndeshjen mes Karabak dhe Partizanit, që do të vendosë nesër kualifikimin për në turin e dytë të Ligës së Kampioneve. Sipas Shensojit, Karabaku mbetet skuadra favorite për të kaluar turin.

“Pavarësisht rezultatit të hapur të ndeshjes së parë, mendoj se Karabak ka shanset më të mira. Ata nuk u mundën në Tiranë. Por tani duhet të jenë shumë më të kujdesshëm. Të gjitha mendimet e Partizanit do të jenë për të shënuar e për të mos pësuar. Megjithatë, besoj se Karabak do të arrijë objektivin e vet”, tha trajneri,

Gjithsesi, ai paralajmëron se shqiptarët do të jenë një kockë e fortë edhe në këtë ndeshje kthimi. “Në rastin më të mirë, Partizani do t’i imponojë Karabakut një luftë në mesfushë, asgjë më shumë. Megjithatë, kjo nuk duhet të qetësojë askënd. Shqiptarët janë të famshëm për kurajën dhe papajtueshmërinë. Psikologjia e tyre është e ndërtuar që të mos dorëzohen asnjëherë. Karabaku duhet të ketë këtë në mendje dhe të ketë durim.

Nuk duhet të çohet gjithçka te penalltitë. Favoritët zakonisht humbasin. Unë e pashë këtë kur isha te Pelisteri, luajtëm finalen e Kupës dhe e fituam me penallti përballë Shkëndijës që ishte favorite. Ndaj Karabak duhet të zgjidhë gjithçka në kohën e rregullt dhe të mos e çojë çështjen te shtesat e penalltitë. Nuk ka dyshim që do ia dalin” tha Shensoj. /vipsport.al/