I kishin borxh 70 mijë dollarë, klubi paguan Sabien Lilajn nga frika e FIFA-s

Sabien Lilaj tashmë është lojtar i lirë për të firmosur në kampionatin izraelit, pasi është shkëputur përfundimisht nga klubi i Gabala, i cili i detyrohej një shumë të majmë mesfushorit të përfaqësueses shqiptare. Futbollisti gjatë javëve të kaluara është stërvitur në Tiranë dhe vetëm këto ditë është nisur drejt Izraelit për të firmosur, pasi shtyu udhëtimin për shkak se u bë baba.

Megjithatë, gjatë këtyre ditëve ai kishte qenë në negociata të vazhdueshme me ish-klubin e tij, Gabala, i cili i kishte borxh një shifër prej 70 mijë dollarësh lojtarit, të cilën nuk ia kishte paguar rregullisht gjatë sezonit të fundit. Kjo kishte qenë arsyeja kryesore pse Lilaj ishte larguar nga ajo skuadër për të udhëtuar tashmë drejt Izraelit ku do të firmosë me Sektzia Nes Tziona.

Lilaj kërcënoi Gabala se do të dërgonte çështjen në FIFA e klubi është detyruar të arrijë një marrëveshje me të për pagesën e shifrës së prapambetur, që të evitonte sanksione apo bllokimin e merkatos. “ I mora të gjithë paratë që më kishte borxh Gabala. Tani gjithçka është në rregull. Tani jam në Izrael, ku do të firmos me një klub këtu”, tha Lilaj për mediat azere, duke i vendosur vulën etapës së tij në futbollin në Azerbajxhan. /vipsport.al/