Bylisi dhe Lushnja organizojnë miqësore, ndeshja mbyllet në barazim

Bylisi ka zhvilluar miqësoren e parë ndaj Lushnjës në stadiumin “Adush Muça”, me takimin që përfundoi me shifrat e barabarta 1-1. Në fakt ka qenë një test për ballshiotët duke aktivizuar lojtarët e stolit por edhe disa të rinj. Bylisi ka provuar edhe dy lojtarë, Ilia Kasapi në mbrojtje i cili do të jetë në provë por edhe sulmuesin Dhamo që vjen nga Seria D e Italisë. Madje, Dhamo ka realizuar edhe golin e parë në këtë provë me ballshiotët.

Duhet theksuar se trajneri Dovedan ka ndjekur me kujdes lojtarët në provë por edhe pjesën tjetër, ata të rikthyer nga huazimet por edhe lojtarët që kanë qenë në stol në sezonin e shkuar. Lushnja në këtë sfidë provoi një skuadër mikse me lojtarë të sezonit të shkuar por edhe shumë të rinj në provë.

Kujtojmë që të hënën, Bylisi nisi përgatitjet dhe pritet që periudhën përgatitore dhe sidomos 10 ditët e para do t’i shfrytëzojë për ndeshje testuese në veçanti për lojtarët në provë, ku në ditët në vijim mund të ketë të tjerë futbollistë në provë. Gjithsesi, ballshiotët këtë sezon e kanë marrë me mjaft seriozitet duke nisur fazën herët, njësoj si ekipet pretendente, ndërsa presidenca ka menduar që të bëj 2-3 goditje cilësore në ditët në vijim.

/E.S.VipSport.al/