Albacete zyrtarizon “Manaj2024”: Një sulmues që po na dhuron lumturi

Klubi i Albacetes ka bërë publik sot blerjen përfundimtare të kartonit të Rei Manajt nga klubi i Interit. Sipas marrëveshjes mes palëve, spanjollët duhej të ushtronin gjatë kësaj vere këtë të drejtë, për të mos e kthyer më te zikaltërit dhe ata e kanë bërë një gjë të tillë, pasi kanë arritur akordin me futbollistin për një kontratë bashkëpunimi pesëvjeçare gjatë të cilës shpresojnë që të jenë të pranishëm për disa edicione edhe në  La Liga.

“Albacete ka ekzekutuar në orët e fundit të drejtën e blerjes që kishte për Rei Manajn. Në këtë mënyrë, sulmuesi shqiptar kalon të jetë në pronësi të klubit tonë, duke mos i përkitur më Interit.

Sulmuesi ynë ndërkombëtar dhe Albacete janë të lidhur në rrugëtimin e tyre deri në vitin 2024, duke vazhduar të shkruajë një histori që filloi në verën e kaluar në mënyrë brilante. Rei mori pjesë në 30 ndeshje e shënoi 7 gola”, shkruhet në njoftimin e klubit

“Jemi shumë të lumtur për blerjen e Rei Manajt. Ai është një futbollist i ri që ndiqnim që në vitet me të rinjtë. Ai është një sulmues që po na dhuron lumturi në të tashmen dhe e dimë që për perspektivën që ka, do të na dhurojë të tilla edhe në të ardhmen”, ishin fjalët e Mauro Perez, drejtorit sportiv të Albacetes. Ky vendim i jep pak qëndrueshmëri karrierës së sulmuesit i cili në tre vitet e kaluara kishte ndërruar vazhdimisht skuadër, duke pasur vështirësi të ambientohej për një kohë të gjatë me një klub. /vipsport.al/