Akord me 3 lojtarë të Kategorisë së Parë, Apolonia ndez motorët!

Apolonia ka nisur që të bëj edhe zyrtarizimet e para. Në fakt kanë qenë afro 10 emra lojtarësh të skuadrave të Superiores, por edhe Kategorisë së parë që kanë qenë në negociata me drejtuesit fierakë.

Në Fier duan që të sigurojnë elitë në sezonin e ardhshëm, ndërsa bëhet e ditur, se pasi kanë ruajtur grupin, tashmë duan që të përforcojnë skuadrën me kualitete. Drejtuesit e klubit fierak kanë punuar me qetësi gjatë këtyre ditëve.

Ndaj dhe kanë mbyllur marrëveshjen me tre futbollistë, që do t’i bashkohen Apolonisë për sezonin e ri. Jurgen Vrapi i Dinamos, Jurgen Vogli i Egnatias dhe Genaldo Sharavolli janë tri përforcimet e para për trajnerin Artan Mërgyshi.

Apolonia forcon kështu fillimisht mbrojtjen dhe mesfushën. Janë të tre futbollistë, për të cilët trajneri i ri i fierakëve e kishte thënë hapur se i donte tek Apolonia.

Ky është vetëm fillimi i merkatos për klubin bardhejeshil, që po vepron në të gjitha pistat dhe me kalimin e ditëve do të kompletohet me elementët që i duhen. Priten edhe futbollistë të huaj, nga Ballkani dhe nga Amerika e Jugut.

E.S./Vipsport.al/