VIDEO / Ronaldo i pandalshëm me tregolësh ndaj Zvicrës, Portugalia në finalen e Nations League

Kristiano Ronaldo ka qenë thuajse i pagabueshëm sot duke ndihmuar Portugalinë që të shkonte në finalen e Nations League, pasi ka mundur 3-1 Zvicrën në gjysmëfinalen e parë. Në një ndeshje shumë të luftuar ku nuk munguan rastet për të dy skuadrat, diferencën e bëri pikërisht ylli portugez, i cili shënoi të tre golat për ekipin e tij.

Me Xhakën e Shaqirin që nga fillimi në fushë, Zvicra u mundua të diktonte rimtin e saj në start ndaj portugezeve, por me  kalimin e minutave u zgjuan edhe luzitanët të cilët kishin në avantazh edhe mbështetjen e tifozerisë pasi miniturneu zhvillohet pikërisht në Portugali.

Për të hapur bilancin e golave në këtë sfidë mendoi Ronaldo, i cili realizoi me një goditje dënimi perfekte duke mundur portierin Zomer në shtyllën e tij. Më pas, Portugalia filloi të mbrohej mirë për t’i lënë vend kundërsulmeve, me Zvicrën që u bë më kërkuese në ndjekje të barazimit. Ai erdhi në pjesën  e dytë të sfidës, kur Rodriguez realizoi një penallti, ndërsa zviceranët nuk hoqën dorë nga sulmet e tyre deri në fund.

Por me një lojtar si Ronaldo në fushë mjafton pavëmendja më e vogël dhe e pëson. Këtë e kuptuam zviceranët në minutat e fundit kur ylli i Portugalisë me 2 gola të 3 minuta prishi ëndrrën e tyre për të shkuar në finalen e madhe.

Tashëm Portugalia pret të dielën të njohë finalisten tjetër, nga fituesja e çiftit Holandë-Angli. Ndërsa humbësja do të luajë po në fundjavë ndaj Zvicrës duelin për vendin e tretë.

Portugali-Zvicër 3-1
25’ , 88′, 90′ Ronaldo / 57′ (p) Rodriguez