Vetëm sheiku ua ndryshoi mendjen, Hasi ishte gati të punonte me gjysmë rroge për familjen

Miliona euro fitime, por jo edhe aq i lumtur me atë që po bën. Kjo është historia e Besnik Hasit në këto vite të fundit, të cilat trajneri shqiptar ka zgjedhur t’i kalojë në Arabinë Saudite. Fitime të çmendura në krahasim me ato që mund të merrte në Europë, por një jetesë larg asaj me të cilën ishte mësuar ai dhe familja e tij. Kjo është arsyeja pse Hasi ka kërkuar me ngulm këtë muaj që të gjejë një sistemim në Europë dhe menaxheri i tij kishte nisur kontaktet me klubet belge.

Mediat në Belgjikë kanë mësuar se familja e Hasit e ka pasur të vështirë që të ambientohej me jetesën në Arabinë Saudite, pavarësisht kushteve shumë të mira që i ka ofruar klubi i Al Raed, ku tashmë Hasi është kthyer në një idhull të tifozëve. Trajneri drejtoi ekipin qetësisht drejt vendit të tetë në klasifikim dhe ishte në garë për t’u shpallur “Trajneri  i vitit” në kampionatin e Arabisë Saudite.

Gjithsesi, jetesa në Arabinë Saudite nuk e kishte kënaqur familjen e tij dhe Hasi u bë gati për një sakrificë të rëndësishme ekonomike, duke hequr dorë nga fitime të sigurta meqë mund të rinovonte kontratën.  Ai përfitonte 1,2 milionë euro në vit nga kjo marrëveshje me Al Raed, por menaxheri i tij, Mogi Bajat, u kishte bërë të qartë klubeve belge se Hasi do të thoshte “po” dhe do punonte në vendin ku mori famë si lojtar e trajner për gjysmën e kësaj shifre.

Në këtë moment, ishte drejtuesi i Al Raed ai që ndërhyri për t’i mbushur mendjen Hasit që të qëndronte edhe një tjetër vit në Arabinë Saudite. Sheiku i ofroi një rritje rroge për këtë vit të dytë, duke e ccuar pagën deri në 1,5 milionë euro, shifër kjo të cilën Hasi nuk e  përfitonte as nëse merrte drejtimin  e klubeve më të famshme në Belgjikë. Ndaj në këtë moment, bashkë me familjen është vendour që ai të qëndronte edhe një vit në Arabinë Saudite, për t’u kthyer më pas në Belgjikë dhe për të tentuar që të bëhet përsëri pjesë e futbollit të rëndësishëm europian. /vipsport.al/