Teuta / Arapi beson: Kalojmë një tur, na duhet një sulmues goli

Teuta ka qenë një nga skuadrat më aktive në merkaton e verës duke afruar lojtarë nga më të njohurit në verë, futbollistë cilësorë nga Superiorja, por edhe nga jashtë. Në një prononcim për “RTV Ora News”,  Renato Arapi, i cili pritet që të jetë një nga shtyllat e skuadrës durrsake në sezonin e ardhshëm ka pohuar: “Sot nisemi për Bullgari dhe presim të përgatitemi sa më mirë për ndeshjen e Kupave të Europës.  Besoj se me aq sa kemi parë, kushtet janë shumë të mira, çka do të na ndihmojë që të forcojmë dhe konsolidojmë ekipin për ndeshjet e ardhshme. Gjithmonë do të ketë largime, por ajo që na bën optimist janë afrimet pasi kanë qenë cilësore”.

Merkato

“Merkato do të jetë e hapur edhe  pas Kupave të Europës dhe normal se do të ketë vend edhe për t’u përmirësuar shumë. Deri tani, besoj se ekipi është pothuajse i kompletuar dhe pak ndryshime do të na përmirësonin akoma dhe më shumë. Shpresojmë që të bëjmë më të mirën atje dhe të përgatitemi denjësisht për ndeshjet që do na vijnë në Kupat e Europës”.

Europa

Si një lojtar me eksperiencë që ka provuar të luajë në Kupat e Europës, me disa skuadra shqiptare, Arapi ka shtuar ndër të tjera se: “Kalimi kërkon eksperiencë por kjo nuk ka bën pesimist për ndeshjet që do të kemi. Besoj se do të futemi në fushë për atë që është objektivi jonë, të paktën të kalojmë një tur. Në ndeshjen e fundit që patëm, prurjet e reja janë përshtatur goxha mirë me ekipin. Shpresoj që edhe lojtarët që kanë ardhur tashmë të përshtaten sa më shpejt me ekipin”.

Sulmi

Nisur edhe nga vuajtjet gjatë sezonit të shkuar për një lojtar goli dhe me largimin e Latif e Vajushi, Arapi ka edhe një kërkesw për drejtuesit: “Ekipi ka nevojë për përforcime sidomos në pjesën e sulmit. Shpresoj që presidenca do të na e plotësojë këtë pjesë, këtë dëshirë, që edhe ne të jemi më komod. Kemi vuajtur shumë te kjo pjesa e golit dhe shpresoj që të vij një lojtar cilësor. Kjo i mbetet sigurisht stafit për ta parë, pasi edhe lojtar goli nuk është e lehtë të gjesh, sidomos në kampionatin shqiptar,” – e mbylli prononcimin e tij, Renato Araapi, një nga titullarët e durrsakëve.

E.S./Vipsport.al/