Situata financiare, Milan i kërkon zyrtarisht UEFA-s ta përjashtojë nga Europa

Milani është gati të sakrifikojë një vit në Ligën e Europës, në mënyrë që të ketë më shumë lirshmëri financiare për të ardhmen për të rregulluar bilancet e saj e të mos penalizohet në një pjesëmarrje të mundshme në Ligën e Kampioneve në të ardhmen. Mund të duket vendim i çuditshëm, por kjo është kërkesa që avokatët e klubit kuqezi i kanë dorëzuar zyrtarëve të UEFA-s në takiin e sotëm në zyrat në Nion.

Milani ka kohë deri në vitin 2021 për të rregulluar pasqyrat financiare, por për shkak të shpenzimeve të kryera në dy vitet e fundit, kuqezinjtë janë të ndërgjegjshëm që nuk arrijnë të përmbushin detyrimet që imponon UEFA brenda këtij afati. Ndaj sanksioni me përjashtimin për një vit nga kompeticionet duket i paevitueshëm. Kjo ka bërë që klubi tashmë të zgjedhë “të keqen më të vogël” në këtë situatë.

Me përjashtimin këtë vit nga Europa, shlyhet edhe masa ndëshkimore e UEFA-s, ndërsa shtohet një vit për të rregulluar bilancet, duke shtyrë datën në 2022. Kjo u jep kohë kuqezinjve të bëjnë manovrat e duhura e sidomos, nuk penalizon një kualifikim të mundshëm të tyre në të ardhmen në Ligën e Kampioneve.

Nëse UEFA do të pranojë këtë kërkesë, atëherë në vend të kuqezinjve në fazën në grupe të Ligës së Europës do të shkonte direkt Roma, me Torinon që do të niste rrugëtimin e vet në kualifikuese. /vipsport.al/