Rrezikonte të vdiste në fushë, mjekët ndalojnë sulmuesin para debutimit në Kupën e Afrikës

Një kontroll i zakonshëm para një turneu të rëndësishëm kontinental siç është Kupa e Afrikës, ka shmangur një tragjedi, edhe pse ka lënë Kamerunin pa një prej sulmuesve të saj. Një ditë para ndeshjes së parë që skuadra e drejtuar nga Klarens Sedorf dhe Patrik Klaivert do të zhvillojë përballë Guinea-Bisau, është dhënë lajmi se sulmuesi 25-vjeçar Xhoel Tagueu, nuk mund të merrte pjesë në aktivitet për probleme të rënda shëndetësore.

I gjithë ekipi i ishte nënshtruar testimeve fizike në Katar, para udhëtimit drejt Egjiptit, ku është konstatuar se Tagueu kishte probleme kardiake dhe sipas mjekëve, ekzistonte një mundësi e madhe që ai të vdiste në fushën e lojës gjatë sforcos. Sipas tyre, ai ka qenë me shumë fat që nuk i kanë ndodhur probleme të tilla në karrierën e tij.

Tagueu ka qenë që në moshën 16-vjeçare larg Kamerunit, ku ka lindur, duke luajtur në Brazil deri në vitin 2018 edhe me ekipe të njohura si Botafogo e Santos, para se të transferohej te Maritimo. Duket e çuditshme por askush nuk kishte konstatuar problemet e tij kardiake deri në këtë moment, ndërsa ekipi i Kamerun është tronditur nga ky lajm, pasi futbollistit do t’i duhet të kryejë teste të tjera më të hollësishme për të mësuar nëse do të mund të kthehet më ndonjëherë në fushën e lojës. /vipsport.al/