Riberisë nuk i hiqet nga mendja Topi i Artë: Ishte padrejtësia më e madhe në karrierë

Frenk Riberi tashmë ka mbyllur pas 12 viteve aventurën me Bajernin e Mynihut, ndërsa është në pritje të një oferte e cila do t’i japë stimulin e duhur për të vazhduar në moshën 36-vjeçare. Ndërkaq, në një intervistë për L’Equipe, francezi ka rikthyer edhe një herë në memorie çmimin e Topit të Artë në vitin 2013.

Vit në të cilën, sulmuesi udhëhoqi Bajernin në triumfin e Champions League, megjithatë sërish ky fakt nuk mjaftoi që në fund Riberi të shpallej fituesi i çmimit prestigjioz individual, teksa u mposht në atë garë nga Kristiano Ronaldo. Riberi është shprehur se ajo është padrejtësia më e madhe që i është bërë ndonjëherë.

“ Ka qenë më shumë se thjesht një zhgënjim, ka qenë padrejtësia më e madhe në karrierën time. Dhe jo vetëm për mua por edhe për shumë persona të tjerë. Isha më i miri në atë vit dhe sërish përfundova i treti. Nuk i kisha asgjë zili ndaj Mesit dhe Ronaldos në atë vit. E them me shumë përulësi sepse kjo është e vërteta”, u shpreh Riberi.

/Egi Çabeli-VipSport.al/