Reali provon sërish për Eriksen, miliona plus një lojtar i madrilenëve për anglezët

Reali i Madridit nuk ka hequr dorë nga ëndrra për të nënshkruar me patjetër një mesfushor në këtë merkato veriore. Në majën e dëshirave të trajnerit Zidan qëndron Pol Pogba, megjithatë për të mbërritur te francezi nuk do të jetë aspak e lehtë me kërkesat financiare të Mançester Junajtid por edhe konkurrencën e Juventusit.

Megjithatë, madrilenët e kanë një ‘as nën mëngë’ dhe ai është mesfushori i Totenhemit, Kristian Eriksen. Danezi është gati të provojë një aventurë të re në karrierë, ndërsa Spanja dhe Madridi janë destinacioni i preferuar. Në fakt, Eriksen është një objektiv i vjetër i ‘Los Blancos’, por ky sezon ishte një konfirmim më shumë i Eriksen se është gati për një ekip të madh. Për të bindur Totenhemin nuk do të jetë aspak e lehtë, megjithatë Reali ka gati një ofertë të re.

50 milionë euro plus kartonin e mesfushorit, Dani Sebajos. Sebajos ka marrë vendimin për t’u larguar pasi hapësirat te madrilenët nuk janë të garantuara dhe në këtë formë drejtuesit e Realit ia kanë ofruar anglezëve. Tashmë, mbetet për t’u parë nëse londinezet do ta pranojnë propozimin edhe pse duhet përmendur se kërkesat e tyre për kartonin e Eriksen janë shumë më të larta se oferta nga Reali.

/Egi Çabeli-VipSport.al/