Pas Bares dështon edhe Manaj, kthimi në La Liga duket shumë larg

La Liga nuk do të jetë e thjeshtë për t’u fituar nga Keidi Bare dhe Rei Manaj, pasi të dy futbollistët aktualisht duket se as nuk mund të arrijnë finalen e play-off për të përcaktuar ekipin i cili në edicionin e ardhshëm do të luajë në elitën e futbollit spanjoll.

Pas humbjes 4-2 të Malagas një ditë më parë, sot e kishte radhën Albacete e Rei Manajt që të mundej 2-0 në fushën e Majorkës në takimin e parë. Sulmuesi shqiptar ishte titullar në këtë sfidë dhe provoi në çdo mënyrë që të gjente rrjetën, por pa pasur sukses.

Rastin më të mirë e kishte në fundin e pjesës së parë, kur me zgjuarsi ekzekutoi një goditje dënimi duke kaluar topin poshtë barrierës, por nuk ia doli të gëzonte pasi sfera u devijua me vështirësi nga mesfushori Salva Sevija. Më pas, në pjesën e dytë, në favor të tij nuk u akordua as një penallti pas një mbajtje në zonë.

Manaj la fushën e lojës me rezultatin 1-0 për vendasit në minutën e 67, ndërsa disa minuta më parë edhe ishte ndëshkuar me karton të verdhë. Por skuadra e tij nuk arriti të prodhonte më shumë në fazën ofensive. Përkundrazi, pësoi golin e dytë para mbylljes së ndeshjes duke e bërë më të vështirë misionin e përmbysjes në ndeshjen e kthimit. /vipsport.al/