Pas 5 sezoneve rikthehet Ndreu: Kastrioti me projekte në merkato dhe infrastrukturë, sfida jonë është Superiorja

Rikthehet pas 5 sezoneve në Krujë dhe trajneri tashmë i zyrtarizuar, Ramazan Ndreu shpalos synimet, madje ai flet gjatë duke nisur që nga objektivat, largimet apo merkato, financat dhe infrastruktura. Për mediat, në konferencën e tij të parë si trajner i krutanëve, Ndreu ka pohuar: “Është një emocion i ligjshëm, kam një jetë që kam kontribuar si lojtar, pjesëtar stafi në klub dhe trajner. Jam i emocionuar dhe synojmë që ta ngjisim sa më shpejt në elitë. Skuadra e Kastriotit falë një financimi të rregullt ishte një nga ekipet më solide sezonin e shkuar. Më pëlqen dhe më kënaq projekti”, – tha Ndreu fillimisht.

Skuadra

“Shpresoj që të bëjmë më të mirën duke bashkëpunuar me stafin për të grumbulluar elementë cilësorë si edhe në sezonin e shkuar. Do të na largohen edhe 3-4 lojtarë dhe nëse ata shiten, do të zëvendësohen me kualitete. Do të fillojmë punën dhe do të bëjmë një skuadër shumë të mirë”.

Formula

“Për mendimin tim formula e Kategorisë së Parë duhet që të ndryshojë. Nuk mundesh që të grumbullosh pikë dhe mundohesh tërë sezonin dhe në fazën e tretë të afrohet një skuadër që nuk ka qenë sa ty gjatë garës. Duhet që të rishikohet struktura e garës, kam dëgjuar që do të ndryshojë dhe shpresoj të ndodhe sepse është shumë më mirë në të mirë të futbollit”, – u shpreh Ndreu.

Stadiumi

“Një element shumë i rëndësishëm është fusha. Kam biseduar me presidentin dhe duke qenë se nuk është akorduar fondi për tribunën dhe shumë ndryshime në stadium, kemi menduar që të bëhet me prioritet fusha dhe minimalisht të bëhen dhoma të tjera zhveshje për të pasur standarde. Besoj se do të realizohen shumë shpejt. Asgjë nuk është e lehtë, por mendoj se kemi eksperiencën dhe skuadra do të fillojë që tani nga puna për të kapur Superioren. Eksperienca na ndihmon shumë pasi duhet ë të bëjmë një punë jashtëzakonisht të madhe”, – ka theksuar Ndreu në fund të prononcimit.

E.S./Vipsport.al/