Omuri: Pseudotrajnerët e lanë Bathën larg Tiranës, jo merkato për të mbushur rreshtat

Bedri Omuri, një nga emrat më të njohur të historisë së Tiranës ndër vite, mendon se bardheblutë nuk janë ende aty ku pritet nga ata, edhe pse kanë filluar këtë verë me vrull duke afruar emra të njohur për Superioren si Kale, Torasa e Batha.

Sipas Omurit, i cili ka drejtuar Bathën në radhët e ekipit të të rinjve të Tiranës, është pikërisht ky i fundit ai që duhet vlerësuar më shumë nga tifozeria pasi prej vitesh duhej të kishte qenë pjesë e skuadrës bardheblu.

“Me emra duket mirë për momentin por prapë disa lojtarë nuk duket se janë të përshtatshëm për te Tirana. Duhet t’i heqin dhe jo të marrin sa për të mbushur rreshtat. Ata kanë qenë shumica te Vlora por përveç Bathës pjesa tjetër nuk më duken për Tiranën.

Batha ka qenë lojtar shumë i mirë, më bënte çudi që e shihja në rol tjetër në vitet e fundit. Ai ka qenë golashënues e organizator shumë i mirë, ka rol të ri, nuk e di pse në ekipet ku ka qenë. Shpresoj që me Tiranën të shfaqet më mire se me të tjerët. Reagimi i Tifozëve? Ai ka qenë pjesë e Tiranës, futbolli është profesionist sot. Duhej të ishte te duhej të ishte te Tirana prej kohësh, por u bë padrejtësi dhe e neglizhuan. Rubio e pëlqeu shumë atë vit, por pastaj erdhën disa pseudotrajnerë dhe nuk e morën”, shpjegoi Omuri për RTSH.

Sipas tij, merkatoja bardheblu duhet bërë e kujdesshme e sidomos u duhet dhënë një dorë talenteve që po dalin nga akademia e klubit. “Mendon se më shumë duhen mbrojtës, një mesfushor e dy sulmues të rinj, Ngo mund të jetë pjesë, por jo alternativë kryesore. Ka elementë cilësore te të rinjtë e paratërinjtë, Kush ka luajtur ka bërë shumë mirë dhe duhen përkrahur”, tha ish-futbollisti i njohur i bardhebluve. /vipsport.al/