Një aleat i papritur, Everton i jep 78 milionë euro Barcelonës për të padëshiruarit

Nëse Barcelona ka një futbollist të padëshiruar që kërkon ta largojë, nuk është çudi që pas pak javësh ta shihni të veshur me fanellën e Everton, klub i cili është i lumtur të paguajë dhjetëra miliona euro për lojtarët që largohen nga katalanasit.

Sot ka qenë finalizimi i marrëveshjes së tretë brenda vitit, që ka çuar në arkat e katalanasve 78 milionë euro dhe ka evituar humbje të tjera më të rëndësishme për lojtarë që cilësoheshin jashtë planeve. Everton bleu sot për 25 milionë euro Andre Gomes nga  Barcelona, një futbollist të cilin e kishte huazuar për 2,5 milionë euro në vitin e kaluar. Lojtari portugez ishte jashtë planeve të katalanasve të cilët nuk i bindi për dy sezonet kur veshi fanellën e tyre dhe sigurisht që ishte i lumtur të firmoste për 5 vite me Everton.

Më parë, klubi anglez kishte paguar 20 milionë euro për kartonin e Lukas Dinje, ndërsa pagoi për 30 milionë euro kartonin e Jerri Mina, të dy lojtarë të cilët nuk gjenin hapësira te katalanasit. Në total, brenda një viti përllogaritet se Everton ka kaluar rreth 78 milionë euro në arkat e katalanasve, të cilët duket se kanë gjetur bashkëpunëtorin ideal për të zgjidhur telashet e tyre me futbollistë të padëshiruar. /vipsport.al/