Muçi dhe Broja të papërmbajtshëm, Shqipëria U-19 mund përsëri Kosovën

Tjetër fitore e Shqipërisë U-19 ndaj Kosovës. Skuadra e drejtuar nga trajneri Nevil Dede fitoi 4-1 në miqësoren e luajtur sot në stadiumin “Fadil Vokrri” në Prishtinë, ndërkohë që miqësoren e parë e kishte fituar me rezultatin 3-1.

Edhe këtë herë kuqezinjtë kanë dominuar, çka e vërteton edhe rezultati. Ernest Muçi, sulmuesi i ri i Tiranës, shënoi me penallti në minutën e 23-të. Armando Broja që vjen nga Çelsi, dyfishoi në fundin e pjesës së parë. Sapo nisi pjesa e dytë, Kosova shënoi golin e nderit me Bytyqin, por Muçi dhe Broja, të papërmbajtshëm, kanë shënuar edhe nga një gol tjetër secili, duke e mbyllur këtë ndeshje me nga një dopietë.

Në miqësoren e luajtur më 3 qershor mes Shqipërisë U-19 dhe Kosovës U-19 në Drenas, që përfundoi 3-1, autorët e golave ishin pikërisht këta dy lojtarë, Muçi me dy gola dhe Broja me një gol. Janë dy lojtarë që po bëjnë diferencën te 19-vjeçarët me golat që po shënojnë, edhe pse bëhet fjalë vetëm për ndeshje miqësore.

Trajneri Dede e nisi ndeshjen me këtë formacion: Malaj, Shiba, Selishta, Hida, Rrahmani, Morina, Rrapaj, Karica, Muçi, Prengaj dhe Broja. Në pjesën e dytë u aktivizuan edhe Rexhepi, Beqja, Arapi, Asllani, Kacbufi dhe Gashi. / Vipsport.al