Mbrojtësi i Kukësit i bashkohet Gjimshitit me shokë, merr titull nderi në Kosovë

Mbrojtësi i Kukësit, Faton Xhemaili ishte ndër të vetmit shqiptarë që luante në kampionatin serb dhe vendosi të luante me Shqipërinë U21, duke bërë jo pak bujë në Serbi. Mbrojtësi nga Kosova që karrierën e tij e nisi në Serbi, nuk e harroi asnjëherë prejardhjen dhe tashmë luan në Shqipëri me Kukësin.

Mbrojtësi 20-vjeçar ka marrë ditën e sotme një titull nderi në Kosovë me motivacionin “Ambasador i Luginës”. Xhemaili së bashku me futbollistë si Berat Gjimshiti, Gjelbrim Taipi, Shqiprim Taipi e Arbnor Fejzullahi, kanë qenë padyshim një imazh për promovimin e kësaj zone shqiptare. Titulli u është dhënë nga vetë kryetari i Luginës së Preshevës, Ragmi Mustafa.

“Sot, pata nderin dhe kënaqësinë në cilësinë e kryetarit të Këshillit Kombëtar Shqiptar të ndajë titullin “Ambasador i Luginës” për përfaqësimin dhe promovimin e vendlindjes me forcën e shembullit të tyre.

Emra që janë sinonim i profesioneve që ushtrojnë. Shefat Isufi, Berat Gjimshiti, Arbnor Fejzullahi, Gjelbrim Taipi, Samir Ramizi, Faton Xhemaili, Leotrim Pajaziti, Shqiprim Taipi.

Këta janë heronjtë dhe krenaria e Luginës së Preshevës.

Me përkushtimin e pashoq dhe angazhim e paepur kanë dëshmuar se të pamundurën e kanë bërë të mundur.

Luginën e Preshevës e kanë ngritur në majat më të larta të garave në arenën ndërkombëtare. Po frymëzojnë gjeneratat e së ardhmes në Luginë të Preshevës dhe jo vetëm .

Në vazhdimësi do të e ndajmë këtë dekoratë edhe për gjithë heronjtë tjerë të talentuar që po tregojnë potencialet e jashtëzakonshme botës”, shkruhej në mesazhin e kryetarit Mustafa. /Erjon Allaraj-VipSport.al/