Lerda nis punën te Partizani, ekipi zbret në fushë për herë të parë në Slloveni

Trajneri i Partizanit, Franko Lerda, sot ka zhvilluar seancën e parë stërvitore në drejtimin e të kuqve, të cilët kanë mbërritur që në orët e para të mëngjesit në Slloveni. Klubi kryeqytetas do të qëndrojë atje deri në ditët e para të korrikut, për të përgatitur ndeshjet e Ligës së Kampioneve që do të luajë ndaj Karabak.

Skuadra ka zbritur në fushën e lojës sot pasdite me ndryshime në përbërje, ku binte në sy sigurisht prania e Hakajt dhe Kordeiros, dy lojtarëve të cilët pritet të jenë krahët e rinj të prapavijës së të kuqve në sezonin në vijim. Sigurisht që është punuar në aspektin fizik, në një moment kur lojtarët sapo janë kthyer nga pushimet, por edhe me top, pasi Lerda ka dashur të shohë në veprim futbollistët që në këtë ditë të parë në tokën sllovene dhe të fillojë t’u ngulitë atyre idetë e tij.

Të kuqtë, pasi kanë njohur kundërshtarin në Ligën e Kampioneve, pritet që në ditët në vijim të ndërtojnë planin si të jenë në maksimum në ndeshjet europiane. Për këtë arsye do të zhvillojnë disa ndeshje miqësore ku një prej tyre është ajo ndaj FK Sarajevo më 23 qershor. /vipsport.al/