Largimi nga Kombëtarja dhe deklaratat e Rejës i “prishin punë”, Grezda mund të mbetet në Skoci

Eros Grezda është kthyer së fundmi në një çështje jo vetëm te Rejnxhërsi në Skoci, por edhe te Kombëtarja. Sulmuesi kuqezi vendosi pak ditë më parë të largohej nga grumbullimi për arsye personale dhe më pas njoftoi se ka një problem shëndetësor, pretendim ky i hedhur poshtë nga trajneri Edi Reja.

Tekniku italian u shpreh se ishte një vendim i Grezdës pasi nuk po përputheshin idetë dhe se përgjegjësitë për atë largim nga Kombëtarja do t’i mbajë vetëm ai. Kjo deklaratë e Rejas ka bërë jo pak bujë në Skoci ku së fundmi Grezda është kthyer në një çështje diskutimi edhe në media dhe te tifozët.

Besimi te Grezda ishte i ulët dhe duke parë sjelljen e tij të fundit me Kombëtaren, karshi tij ka një tjetër këndvështrim tashmë. Në Skoci kanë nisur të dyshojnë edhe për karakterin e Grezdës dhe mediat e ndryshme raportojnë se Rejnxhërs është gati ta shesë por me sjelljet e tij duket se nuk ka asnjë klub të interesuar, gjë e cila e mban në “Ibrox Stadium” si të padëshiruar. /Erjon Allaraj-VipSport.al/