Kukësi përgatitet për finalen e Kupës, jep detajet e udhëtimit për tifozët

Kukësi dhe Tirana do të ballafaqohen nesër në stadiumin “Elbasan Arena” për finalen e Kupës së Shqipërisë ku dy skuadrat synojnë që të mbyllin sezonin me një trofe, ndërkohë që Tiranës do t’i jepte mundësinë për të luajtur në Europë. Të dyja skuadrat e kanë vlerësuar maksimalisht finalen dhe e dinë mirë rëndësinë e tifozëve në ndeshje të tilla.

Kështu, klubi i Kukësit ka vendosur autobusë falas për tifozët e tyre duke ua bërë më të lehtë që të jenë të pranishëm në një ndeshje të tillë. Sakaq, nëpërmjet një postimi në rrjetin social “Facebook”, klubi i Kukësit ka dhënë edhe detaje në lidhje me autobusët dhe nisjet e tyre nga Kamza, Kukësi dhe nga Durrësi.

Njoftim i klubit:

“Të gjithë tifozët, që dëshirojnë të udhëtojnë me autobusët që Klubi ynë ka mundësuar, për ndeshjen finale të Kupës së Shqipërisë, FK Kukësi – KF Tirana, i njoftojmë, se nisja drejt qytetit të Elbasanit, nga Kukësi, do të bëhet në orën 15:00 pranë stadiumit “Zeqir Ymeri”.

Për tifozët, që do të nisen nga Kamza dhe Durrësi, njoftojmë, se duhet të deklarojnë numrin e saktë dhe, në një moment të dytë, do të bëhet publikimi i orareve dhe vendeve të nisjes!

Ndërkohë që çmimet e biletave janë:

Tribuna Vip: 2.000 lekë.

Tribuna A+B: 1.000 lekë.

Tribuna C,D, E,F dhe G: 2.00 lekë.

Biletat mund ti siguroni në Tiranë te dyqani zyrtar i FSHF si dhe biletaria e stadiumit “Elbasan Arena’”, shkruhej në njoftimin e klubit verilindor. /Erjon Allaraj-VipSport.al/