Karabaku përforcohet para ndeshjes me Partizanin, firmos me ish-mesfushorin e Udinezes

Karabaku dhe Partizani do të përballen në ndeshjen e turit të parë eliminator për në Ligën e Kampionëve ku azerët, shihen si favoritët kryesorë për të kaluar më tej. Përbërja që ka në skuadër Karabaku, e bën dukshëm një kundërshtar të fortë, duke menduar edhe eliminimin që i bëri Kukësit sezonin e kaluar ku pas barazimit 0-0 në Shkodër, arriti të fitonte 3-0 në ndeshjen e kthimit.

Sakaq, Karabaku ka bërë një tjetër përforcim të rëndësishëm duke firmosur me një mesfushor krahu. Bëhet fjalë për spanjollin Jaime Romero i cili sezonin e fundit ka luajtur në 30 ndeshje me Kordoban në Ligën e Dytë spanjolle. Mesfushori që mund të luajë edhe si sulmues i djathtë, shihet si një përforcim mjaft i rëndësishëm për skuadrën azere.

Në të kaluarën e tij, mesfushori 28-vjeçar ka qenë edhe pjesë e Udinezes ndërkohë që ka një CV të pasur me skuadra të ndryshme të cilat i ka provuar në kampionate të forta europiane. Ai ka arritur të realizojë edhe dy gola në Spanjë këtë sezon ndërkohë që ka dhënë edhe dy asiste. /Erjon Allaraj-VipSport.al/